Firwat sollt Dir den Télévie ënnerstëtzen?

Bei eis am Land sinn et nämlech järlech méi ewéi 3.000 Erwuessener a Kanner, déi mat der Diagnose Kriibs konfrontéiert ginn. Eng Persoun vun 4 stierft u Kriibs. Kriibs kann am Laf vum Liewe jiddereen treffen. Déi meescht Patiente kënnen duerch en chirurgeschen Agrëff geheelt ginn, mee et bleift awer leider nach e groussen Deel bei deenen dat net duergeet an d’Krankheet muss mat Bestralungen, Chemotherapie, Hormontherapie oder aner méi geziilte Methode behandelt ginn.

Och wann d’Fuerschung hei zu Lëtzebuerg an am Ausland an deene leschte Joere vill Fortschrëtter gemaach huet, stierwen nach ëmmer ze vill Leit u Kriibs. All Dag verléiere vill Familljen hei zu Lëtzebuerg eng Persoun duerch Kriibs, well d’Mecanismë vun där Krankheet nach net erfuerscht sinn. Fir de Kriibs nach besser kennen ze bekämpfen, muss d’Fuerschung aktiv vu jidderengem ënnerstëtzt ginn.

De Sënn an Zweck vum Télévie ass et fir d’Recherche géint de Kriibs a speziell d’Leukemie bei de Kanner virun ze bréngen. Dofir ass den Télévie 1989 an der Belsch lancéiert gi vum Fonds National de la Recherche Scientifique. Am Joer 2002 huet och Lëtzebuerg sech där grousser Aktioun ugeschloss an zanterhier hu Joer fir Joer dausende vu Leit ewéi Dir, sech fir den Télévie engagéiert. Säit dem Joer 2002 bis 2023 inclus konnten hei zu Lëtzebuerg iwwer 29 Milliounen Euro an d’Kriibsfuerschung investéiert ginn.

E fantastesche Montant, deen nëmmen duerch Iech konnt zesummekommen, ob et duerch eng Manifestatioun, e Gebuertsdag, en Don war – dofir e ganz grousse MERCI.

D’Aktioun Télévie lieft duerch Ären onermiddlechen Asaz, an dofir si mir och fir d’ Editioun 2023 - 2024 op Iech ugewisen!

Zesumme géint de Kriibs! Merci

D'Leukämie


Wat ass eng Leukämie?

D’Leukämieë si Kriibserkrankungen vum Muerch vun de Schanken, wou normalerweis d’Bluttkiirpercher produzéiert ginn.

Wat geschitt wann e Patient eng Leukämie huet?

Bei enger Leukämie gëtt d’Muerch vun de Schanken vun enger grousser Quantitéit vu Leukämieszellen erstéckt, déi vum Kiirper produzéiert an dann an d’Blutt eriwwer ginn. D’Muerch ka keng normal Bluttzelle méi produzéieren. Wann net genuch wäiss Bluttkierpercher am Kierper sinn, riskéiert de Patient schwéier Infektiounen ze kréien, bei ze wéineg roude Bluttkierpercher besteet de Risiko vun enger Anémie, an e Manktem u Bluttplaquettë kann déidlech Bluddungen ervirruffen.

Wat sinn d’Ursaachen vun enger Leukämie?

Ganz dacks fënnt een d’Ursaache vun enger Leukämie net eraus. A verschiddene Fäll kënnen Anomalien detectéiert ginn déi genetesch Ursaachen hunn , duerch e Virus provozéiert goufen oder awer wann d’Persoun mat verschiddene chemesche Substanzen, respektiv Strahlen a Kontakt war.
Den Télévie sol de Fuerscher an den Dokteren et erméigleche fir d’Ursaache an d’Mechanisme vun de Leukämien erauszefannen an iwwert dee Wee d’Traitementer ze verbesseren.